العمل الانساني


ادوارد * العمل الانساني .

انك تكون شخص ذو عمل انساني وتعمل وفق حقوق الانسان الدولية والطبيعية من انقى المهن الانسانية ،
انك تقدم خدمة للمقابل وتمد يد المساعدة لناس تحتاج مساعدتك وتعمل بكل طاقتك علمود ترسم ابتسامة حلوة على وجوهم وترجع الامل الهم هل عمل يطلب منك انك تكون مجرد من جميع معتقداتك وعاداتك وتقاليدك وحتى دينك علمود تتعامل ويا الغير بطريقة انسانية وتليق بمستوى الانسانية (الى وصل الى ادنى مستوياته بالوقت الحالي)
انا اعمل كمعالجة نفسية في احد مؤسسات الغير حكومية في ناحية القوش/ تلكيف هلعمل يطلب مني اكون متجردة من افكاري الشخصية الدين القومية معتقداتي وكذلك عاداتي الشخصية والتصرف حسب المهنة (تعلمت انو اتجرد منها حتى بحياتي العادية من اتعامل مع بقية الناس )
والأهم والمهم بيهم الأسلوب والكلمات الى لازم عليا انو اهتم بيهم من انطق بيها وكذلك مشاعري ويا الناس سواء داخل او خارج العمل
الاسلوب ليش مهم طريقة كلامي هي راح تكون سبب كسب ثقة الشخص المقابيلي ومحبته وكذلك لا انسى الابتسامة هي مفتاح سحري تكدر تكتسب بيها قلب اي شخص كان موقف ما انساه ابد ويا مراجعة اليا
اول ما شفتها باوعت عليا بصورة غريبة جداا مجانت مرتاحة ابد بسبب وضعها النفسي بس من ابتسمت الها وجها تغير وياي بعد ما كملت وياها الجلسة وقت انها تروح لبيتها كلتلي انا ما عندي ثقة باحد بس الطبيب الى اروح علي و انتِ راح تكونين الشخص الثاني ..
هل شي ما طلب مني انو اعمل اشياء خارقة او اسوي شي مستحيل كان فقط ابتسامة لطيفة ويا اسلوب ينطي للمقابل الثقة
اما اختيارك لكلماتك وهذا الشي الى راح يكون مصدر احترام الناس الك ومحبتهم الك
الكلمات تجرح اكثر وصعب الانسان يشفي منها تنخزن بذاكرة الواحد وتكون سبب مشاكل كثيرة وتتحول الى مشاكل نفسية للشخص وكذلك تكون سبب فشل حياة الانسان
مساعدة الاخرين هي الشي الوحيد الى يخليني اكون سعيدة
هذا كان جوابي من كنت بعمر المراهقة والى حد الان ما تغير هل شي

أيفون ادوارد
www.facebook.com/roosh24

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*